Algemeen, Politiek -

Denkpolisie en gedagteklopjagte

In sy boek 1984 beskryf George Orwell 'n somber toekoms waarin 'n oppermagtige regering volledige beheer oor sy burgers uitoefen. In die toekoms is die departement wat seker maak burgers dink “reg” die Departement van Waarheid. Die Departement van Waarheid is ongenaakbaar in mense wat “verkeerd” dink vervolg deur middel van die denkpolisie. Enige aksie of woord wat daarop dui dat jy “verkeerd” dink het gelei tot mense wat geheimsinnig verdwyn.

Vandag het die denkpolisie in Suid-Afrika toegeslaan.

Vicki Momberg is tot twee jaar tronkstraf gevonnis vir verkeerd dink. Verstaan mooi, ek stem geensins met Mev. Momberg saam nie, ek vind haar gedagtes en taalgebruik onaanvaarbaar en deel nie haar sentimente nie. Ek wil wel nie haar denkpolisie wees nie. Daar moet plek wees in die stryd om idees vir alle idees, goeies en slegtes. Waarmee ek fundamenteel verskil, is die beginsel dat jy tronkstraf opgelê kan word vir verkeerd dink.

My vermoede is dat die regter edel bedoelings het, ons is almal immers dit eens dat rassisme uitgeroei moet word. Tog – soos alle edel bedoelings wat hemel op aarde wil skep, lei dit tot hel op aarde. Wanneer regerings die mag het om mense vir “verkeerde” denke te vervolg, skep dit 'n ongelooflike gevaarlike presedent. Karl Marx het geskryf dat die idees van die regerende klas noodwendig die regerende idees van die samelewing word.

Hierdie uitspraak gee die regering die mag om te bepaal watter denke is “reg” en watter “verkeerd”. Onder sosialistiese regerings vind jy altyd 'n verskrikte burgery wat konstant op eiers loop. Die robuuste debat, wat nodig is vir die stryd rondom idees, word totaal ingeperk. Omdat die regering bepaal wie dink “reg” en wie dink “verkeerd”, lei dit tot ongelooflike dubbele standaarde. Met selektiewe toepassing van wette kan die regering die objektiwiteit van die regbank omseil.

Ons sien dit reeds in Suid-Afrika uitspeel in die growwe dubbele standaarde wat gevolg word wanneer dit kom by rassisme.

Luvuyo Menziwa, 'n EFF Studenteraadslid op UP, het in 2016 gesê dat hy 'n AK-47 of Bazooka kort sodat hy die “regte” ding kan doen en hierdie “duiwelbesete” wit mense dood kan maak. In Maart 2018 bevind die gelykheidshof hom skuldig en beveel dat hy gemeenskapsdiens moet doen en amptelik om verskoning moet vra. Luvuyo Menziwa kry nie twee jaar tronkstraf nie.

Velaphi Khumalo, 'n staatsamptenaar verbonde aan die Gautengse Departement van Sport, Kuns, Kultuur en Rekreasie spreek in 2016 sy behoefte uit om Suid-Afrika te “suiwer” van wit mense. Hy voer aan dat daar met wit mense gehandel moet word soos wat Hitler met die Jode gehandel het. Khumalo is geskors met vol betaling en toe 'n finale geskrewe waarskuwing gegee. Velaphi Khumalo kry nie twee jaar tronkstraf nie.

Majoor M.V. Mohlala, 'n offisier in die Suid-Afrikaanse weermag het in reaksie op 'n plaasmoord gewens die aanvallers het die slagoffer se oë en tong uitgesteek. Dit sou wees sodat die wit slagoffer sy swart moordenaars kon sien, en dan met daardie nagmerrie na sy graf toe kon gaan. Die SAW het Mohlala slegs 'n waarskuwing van toekomstige tugoptrede gegee, geen sprake van twee jaar tronkstraf nie.

Julius Malema het homself al herhaaldelik skuldig gemaak aan haatspraak. Ten spyte van die feit dat hy al skuldig bevind is aan haatspraak is Malema nog op vrye voet, inteendeel hy is die leier van die derde grootste politieke party. In Maart 2018 het hy gesê dat hulle die “keel van witheid gaan afsny” met verwysing na Athol Trollip, DA-burgemeester van Port Elizabeth. Hy het daarna verder uitgevaar en dit duidelik gemaak dat Trollip slegs geteiken word omdat hy wit is, en dat dit vir Malema lekker is om 'n wit man te kan seermaak. Sy straf vir hierdie uitsprake is dat president Cyril Ramaphosa gesê het hy sal hom met ope arms terug in die ANC ontvang. Malema se rassisme word beloon en implisiet verwelkom. Julius Malema word beslis nie tot twee jaar tronkstraf gevonnis nie.

Al hierdie voorbeelde is mense in gesagsposisies, wat wesenlik meer invloed het as Vicki Momberg. Dit is dus duidelik dat die dubbele standaard nog erger toegepas word, met regeringsamptenare en ander mense in gesagsposisies wat onaantasbaar is, en lae-vlak burgers wat “verkeerd” dink wat vervolg word.

Jy het die volste reg om kwaad te wees, daar is 'n onreg gepleeg. Die onreg is nie so seer teen Mev. Momberg nie, maar beslis teen elke burger van Suid-Afrika se reg op vryheid van denke en spraak.

Ons durf nie die denkpolisie as normaal aanvaar solank hulle ons vyande uitsorteer nie. Die dubbele standaarde wat reeds toegepas word rondom rassisme in Suid-Afrika, beteken dat dit 'n kwessie van tyd is voor die denkpolisie aan ons almal se deure klop. Ons durf dit nie toelaat nie.

  •  
  •  
  •  
  •  
Dr. Dirk Hermann Deur Dr. Dirk Hermann


Registreer / Register

Oops! We could not locate your form.

Maak toe / Close