Almal ken die liedjie,  Daar kom die Alibama, maar min mense ken die interessante geskiedenis van hierdie oorlogskip wat vandeesweek 147-jaar gelede in Kaapse waters aangekom het. 

Die Alabama is op 15 Mei 1862 in Liverpool, Engeland, te water gelaat nadat sy in die geheim deur die Suidelike State van Amerika gebou is.  Die oorlogskip sou onder die Suide se vlag aan die Amerikaanse  burgeroorlog deelneem.    Die Alabama moes  verhoed dat voorrade uit Europa en die res van die wêreld die Noordelike State van Amerika bereik.  Een van die spannende seegevegte waarin sy betrokke was, het op  6 Augustus 1863 in Tafelbaai plaasgevind.  Die Alabama het die skip Sea Bride aangeval.  Die Kapenaars het strand toe gestroom en die geveg angstig dopgehou.  Die stryd het die Kaap se veiligheid op geen wyse geraak nie, maar was ‘n skouspel waaraan die bevolking hulle vergaap het.

Hierdie keer het die Alabama gewen, maar op 20 Junie 1864 was sy nie so gelukkig nie.  Sy is naby die Franse kus deur die Noordelike State se fregat, Kearsarge, gesink.  Weer het ooggetuies van die Franse en Britse kus af die geveg dopgehou.

Al het die Alabama kwalik twee jaar lank die see bevaar, leef haar legende  steeds voort in ons Afrikaanse volksliedjie. ‘n Artikel van Wikipedia beskryf haar merkwaardige rekord so:  “Upon the completion of her seven expeditionary raids, Alabama had been at sea for 534 days out of 657, never visiting a single Confederate port. She boarded nearly 450 vessels, captured or burned 65 Union merchant ships, and took more than 2 000 prisoners without a single loss of life from either prisoners or her own crew.”

Onthou gerus die merkwaardige stoomskip en haar dapper kaptein, Raphael Semmes, en die bemanning wanneer jy weer oor die “Alibama” sing!

Bronne:

http://en.wikipedia.org/wiki/CSS_Alabama

A.J. Böeseken, Die Nuusbode, Nasou, Kaapstad, geen datum.

F. Wallis, Nuusdagboek, Human en Rousseau, Kaapstad, 2000.

  •  
  •  
  •  
Deur Alana Bailey


Registreer / Register

Oops! We could not locate your form.

Maak toe / Close